中環出更：葉佩珮眼鏡不離身 皆因年幼大懵教訓
香港地唔少學生努力讀書，隨之而來嘅就係特別多人戴眼鏡，香港眼科醫學會會長葉佩珮尋日出席港大學生會搞嘅「明辨視非」活動時，就講起自己中學已經戴眼鏡，仲試過有次冇戴眼鏡去游水，喺泳池邊跌倒添，自從嗰次之後，佢就眼鏡不離身啦！
葉佩珮講起，依家近視有年輕化趨勢，有時小朋友嚟驗眼後，知道要戴眼鏡就會扭計，佢就會出「撒手鐧」氹吓佢哋，話戴咗眼鏡讀書睇得清楚啲，同埋個世界好美麗o架，咁小朋友就會好乖咁戴眼鏡。認真有計！
今次出席活動嘅嘉賓仲有醫學界議員陳沛然及港大眼科學系副教授勞卓妍，陳沛然致詞時講起，自己鍾意行山及運動，有時周六放假想帶家人行吓山，無奈太太比較文靜同工作量太大，好多時都令計劃取消。直到細女七歲時，發現需要佩戴眼鏡，太太開始知驚，所以依家一有時間都會一家人行吓山。陳沛然又講起覺得保養眼睛，最緊要就係做多啲運動，同埋唔好睇咁多電話及電腦，就算自己有好多文件要睇，為咗保養雙眼，都會一隻手指熄咗部電話佢！
勞卓妍小一開始變四眼妹
勞卓妍就講起，自己小一開始戴眼鏡，都算深近視一族，試過有次冇戴眼鏡等巴士，因望唔清數字，上巴士後，行行吓發現條路線唔係好啱，先知道原來自己上錯巴士，又試過喺屋企攞嘢時，因為冇戴眼鏡，所以成日攞錯嘢，既然已經近視，佢惟有好好保養眼睛，畀多啲時間對眼休息，又會食枸杞明目咁話。
卓妮