政情：程振明派定心丸 撐住圍村仲安全
香港近月出現連場示威，而且唔只局限於港島，港九新界都無一幸免，其中元朗區更曾經出現襲擊事件，激起城鄉矛盾，有人驚到要搬離鄉村。不過，十八鄉鄉事委員會主席程振明就認為圍村仍然好好住，話非原居民唔使擔心，現時反而更多人搬入村住喎。
話原居民唔會恰人
程振明話唔好聽埋坊間嘅閒言閒語，大讚住圍村好安全，因為圍村中嘅非原居民數目，分分鐘比原居民仲多，原居民又唔會恰人，所以對於搬入鄉村住唔使過分擔心，仲大派定心丸叫人放心搬入去村住添！
佢仲講到，香港現時嘅示威活動突如其來，市民外出行街食飯會突然撞正封站無車返屋企，不過呢啲情況多數出現喺油尖旺區而唔係元朗，所以話元朗相對平靜，區內市民嘅消費同生活已經同以前分別唔大，市面同以往差唔多一樣咁熱鬧。