工友明哥與阿強飯後回工地時，發現遠處地面上存有一隻禽鳥屍體。阿強二話不說戴上勞工手套，正當他想上前將鳥屍拿起時，明哥立即喝止。
明哥：「阿強，你想做咩？」
阿強：「明哥，我知道禽鳥屍體可能帶有致病原，鳥屍又位於行人路中心，而且等陣附近有間幼稚園放學喇，所以打算即刻掉咗佢落去垃圾桶，防止畀小朋友接觸到。」
明哥：「一向知你好心地，但你忽略咗自己嘅健康呀！」
阿強：「此話何解？我已經有戴手套保護自己喎。」
明哥指着阿強的手套說：「你戴緊嘅勞工手套都唔防水，又點可以保護自己避免接觸鳥屍嘅血液或體液呢？仲有吖，你隨便將鳥屍棄置落垃圾桶，其實影響埋清潔工友嘅安全。」
明哥：「一般負責處理禽鳥屍體嘅人，佢哋會穿着工作服，配備外科口罩及防水膠手套，有需要時亦會着上即棄膠圍裙，防止被帶有致病原嘅物品濺濕及沾污衣物。另外，佢哋亦會用長嘴鉗將禽鳥屍體放入厚身黑色膠袋內並綁緊，確保避免直接接觸鳥屍。仲會妥善棄置所有用過嘅即棄物品，消毒可再用嘅物品及可能被沾污嘅地方，當然每個過程中都會徹底洗手啦。」
阿強：「唔通我哋應該視而不理？」
明哥：「當然唔係啦！首先要防止任何人觸摸鳥屍，我哋應該即時將受影響範圍妥善圍封，跟住致電政府熱線1823尋求漁農及自然護理署協助啦！」
阿強：「好！明哥你留喺度打電話，我返去拎圍欄過嚟！」
職業安全健康局
www.oshc.org.hk