政情：公民講場：通識科勢變新火頭 延長諮詢期難救

近來社會局勢動盪，大專學界，甚至中學生都話要罷課抗爭，相信教育局局長楊潤雄都要嚴陣以待，謹慎小心處理。而另一邊廂，學校課程檢討專責小組正計劃就中小學嘅課程進行改革，內容就包括近年都有唔少爭議嘅通識科，小組上個月已經發表咗諮詢報告。喺現時緊張嘅社會氣氛之下，通識科檢討分分鐘變成新火頭。楊尋日就話，基於社會對通識科有唔同嘅意見，建議專責小組延長諮詢期一個月，去到十月中咁話。依家已經風頭火勢，延長諮詢期嘅話，當局或可遲啲再處理，都可以話係幫咗楊一把嘅。