笑看天下:溝通冇行動又係廢

林鄭龜縮多時,日前出席行政會議前表示衷心希望社會回復平靜、遠離暴力云云。佢話會立即構建溝通平台,冀藉此化解社會分歧。由「好打得」變「好跪得」嘅林鄭話,最終希望有不同階層、政治立場及背景人士參與,佢同各司局長好願意落區聆聽意見喎!

呢,日前有問責官員落區,被批評全程跟住行,十足布景板咁;又有局長視察環境衞生,只有三句,就係「好」、「知道」、「理解」。官僚廢噏,目前老朽手頭只係掌握咗咁多,畀啲時間老朽,老朽會嚴肅跟進!

看官,老朽係唔係好有做人工高過美國總統嘅高官潛能呢?廢噏當秘笈,又同大家講吓歷史閒話。話說元末,鹽販張士誠見時局混亂,於是佔據蘇州一帶,擁兵數十萬,自號「吳王」。不過,此人好識做,佢對元朝則稱「丞相」。張士誠重用了一些專事趨炎附勢、阿諛奉承嘅小人,一個姓黃,一個姓蔡,一個姓葉,黃蔡葉三條友無惡不作,除了好事,壞事幹盡。後來,張士誠被朱元璋嘅大將軍常遇春、徐達擒獲,押解到南京後自殺身亡。老百姓編了首十七字的「瘸腿詩」,諷刺張士誠用人不當而自取滅亡,詩曰:「丞相做事業,專用黃蔡葉(黃菜葉)。一朝秋風起,乾癟!」讀之有味,夠晒抵死!

林鄭依家咬牙切齒說要立即構建溝通平台,藉此化解社會分歧,之不過佢之前「與民同行」堅離地,完全得唔到民心,是以不少學者同議員都覺得佢係「做場戲」、「得個樣」,認為構建平台亦未必能夠回應民間訴求,又斥其溝通應是長期工作,如今在掀起風波兩個月後才來「亡羊補牢」,係後知後覺。

講真,林鄭月娥若然肯聽意見,老朽晨早就叫佢同「避政司司長」鄭若驊「割席」,佢有聽咩?一個醜聞纏身、知法玩法嘅廢官,只會「佗衰家」!老朽只能吟曰:「反眼做律政,惟靠龜縮功。一朝天雷劈,甲裂!」