「前朝遺物」美食車先導計劃近來被指愈做愈縮水，有部分暫時「停車」添，有指因指定營運地點選址欠佳及限制多，搞到營運困難。
據知，政府預計本月就會新增喺港珠澳大橋香港口岸嘅旅檢大樓，作為美食車新營運地點，位置喺旅遊巴泊位附近。唔少美食車營運地點都冷清清，唔知呢個新地點係咪真係吸到客，可以幫美食車慘淡嘅生意救亡一下嘞！
港珠澳大橋剛開通時，搞到有大量內地旅客湧港，逼爆東涌等地區，惹起市民埋怨。商務及經濟發展局局長邱騰華早喺舊年底曾經講過，唔少旅客只係想體驗大橋，唔一定要入境，透露研究讓美食車喺旅檢大樓附近服務旅客，聽聞預計本月內，大橋旅檢大樓一帶，就會正式讓美食車營辦商申請做營運地點，叫做趕得切暑假完結前啟用。
據知，要喺大橋新增美食車營運地點，需要考慮多個因素，選擇喺旅遊巴泊位附近就係考慮到有位泊、有電又有客，真係唔知反應最終好唔好，但做到幾多個位畀美食車營運就盡量做咁話。
美食車一直都搞唔起，即使新增一個地點，睇怕都好難完全扭轉劣勢嘞！