政情：邊救火邊放水 梁美芬叫政府咪等運到
近排香港打緊政治颱風，因為反對修訂《逃犯條例》引起連串風波，尋日仲撞正天文台掛八號風球，天氣真係好唔穩定。身兼西九新動力主席嘅立法會議員梁美芬（鼠王芬）打風期間上載短片到社交網站，一女拖三男就民生問題一唱一和，梁仲乘機叫政府「放水」紓解民困，「唔可以等運到」。
石硤尾邨石屎剝落 促盡快重建
片段一開波，深水埗區議員陳國偉就話好擔心石硤尾邨嘅「數字樓」，每逢打風落雨都有石屎剝落等問題，但政府又唔宣布重建。西九新動力社區幹事羅國豪話澤安邨同石硤尾邨都有咁嘅情況，而深水埗區議員梁文廣話富昌邨好多街坊覺得又冇重建公屋，維修做唔好，再加上鼠患嚴重，樣樣都做得唔好。
此時鼠王芬就出現，話三位男士搞到佢諗番起以前錄過一個節目「西九男子組」，當時梁文廣同陳國偉都仲未係區議員。鼠王芬忽然又話唔好講政治，話雖然香港好似成個社會情緒低落，但大家「唔可以喺度等運到」，希望政府「一邊救火，一邊幫手」，喺啲冇爭議嘅民生議題入手，多管齊下度橋諗吓做住啲嘢先喎。唔知班高官又聽唔聽到呢？