政情：屋邨問題多籮籮 陳帆頻被捉落區
做政府高官最重要就係掌握民情，所以定期落區都係必須要做嘅事，不過如果地區問題太多，成日落區都咪話唔頻撲！好似運輸及房屋局局長陳帆喺七月中先至被立法會議員陳恒鑌（Ben）捉咗落東北葵附近巡視，點知轉個頭就被另一議員葛珮帆（EQ）捉咗落將軍澳、沙田、馬鞍山，真係忙喇！
雙帆巡視 指乏無障礙設施
阿Ben同佢嘅團隊早排就帶咗陳帆落區，睇咗街市同路邊設施等，今次被EQ捉落新界東。大家個名都有帆字，呢次「雙帆」落區睇乜呢？就係睇屋邨、商場嘅無障礙設施、公共屋邨鼠患等問題。EQ話，其實現時好多區嘅屋邨、商場、公共運輸設施等都缺乏無障礙設施，當中包括缺乏斜台、電梯工程進度緩慢等，搞到長者成日都要行樓梯，險象環生經常受傷！
至於鼠患問題，EQ話有啲公共屋邨嘅垃圾桶係「冇蓋冇底」，吸引老鼠覓食，叫政府換有蓋嘅密封垃圾桶先得。另外，仲有行人天橋漏水、巴士總站路面斜路過大等問題，聽落好似成個社區都係問題咁，雖然陳帆都有表示積極跟進，不過都希望陳帆快啲落手處理，唔好拖成十年八載先搞掂喇！