政情：民主思路核心成員紛跳船 湯家驊眾叛親離

湯家驊喺二○一五年成立聲稱走中間路線嘅民主思路，但成立以嚟一直冇乜特別政績，反而喺唔同時期都有成員決定退出，最多只係有醫管局新界東醫院聯網前總監馮康個女馮海容，加入政府做咗商經局政助。此外，民主思路喺一六年立法會換屆選舉亦曾經派出Gary同麥嘉晉分別出選港島區及新界東選舉，但二人均落敗，及後Gary亦獲政府委任公職，現任兒童事務委員會同平等機會委員會成員，而呢三人近來都先後決定退出民主思路。

黃梓謙出走 嘆人微言輕

Gary尋日喺社交網站宣布退出民主思路，目前未有打算加入任何政治團體。佢話當初加入民主思路，首要目標係修補當時嘅社會撕裂，推動民主發展，創造社會流動，可惜民主思路暫時未能做到，明白社會對民主思路有不少批評，組織成員嘅言論與行事作風不時成為眾矢之的，尤其早陣子，親朋好友、網友，以至工作夥伴，皆向佢表達意見，全因大家知道民主思路有行會成員，希望Gary能影響政府決定。

佢又認為貼地準確回應民眾訴求係從政者最基本要求，政治環境複雜，自己人微言輕，轉達嘅意見未能影響政府每個決定，希望政府以實際行動化解政治危機咁話。似乎暗批湯家驊言論備受批評喎。

政界變色龍 僭建兼失言

老實講，湯家驊近日喺修訂《逃犯條例》風波上言論備受批評，更被點名要求他辭任行會職務。再加上佢臭史甚多，一一年被踢爆其位於大埔康樂園嘅豪宅單位涉嫌僭建玻璃屋，佢當時一度引用自己有份打過嘅僭建官司，死撐話玻璃屋屬豁免規管類別，之後其他法律界人士及屋宇署就指證出錯，佢先話一時記錯案例，向公眾致歉及承諾清拆僭建物，真係𤓓到爆。

一五年喺立法會未能通過政改方案後，佢退出公民黨並辭任立法會議員，之後成立民主思路，至前年現屆政府上場，佢被委任為行會成員，成為建制一分子，有人稱佢為「政界變色龍」。

講真嗰句，湯家驊臭史多、失言又多，加上今次修訂《逃犯條例》風波搞到一鑊粥咁，身邊啲人離棄佢都不足為奇吖！