中環出更：盛載與妻叮叮情緣沈慧林守護電車
繁忙都市中，搭電車都變得浪漫。杭州香港青年會創會會長沈慧林（William）近日出席香港電車慶祝一百一十五周年派對時，講起由細到大都搭電車，細細個就搭電車去探爺爺，長大後就同女朋友一齊搭電車去銅鑼灣嘅中央圖書館去溫書備考專業試，讀完書仲會去拮魚蛋食添！聽落認真甜蜜。
William話自細住北角，細個時同爺爺感情好好，所以會搭電車去探爺爺，到廿四、五歲，就同當時嘅女朋友、即係依家嘅太太，一齊去圖書館讀書，二人都要考唔同嘅專業試，所以雙雙去讀書。佢話好多時電車都會爆滿，所以有位就會坐，但都會讓畀長者坐，而有時太多人，都要預早逼去門口才能落車。對於早幾年有人建議拆咗電車，佢就唔同意，覺得電車係代表香港歷史文化，又經濟實惠，又唔會塞車咁方便，應該保留。
張喻斯藉電車發掘人情故事
由於當日係香港電車一百一十五歲生日，香港電車都特別同非牟利團體iDiscover同本地攝影師合作，搞咗個電車嘅攝影展。iDiscover嘅項目經理張喻斯（Stephanie）都話，相信當年大眾嘅意見都係反對拆電車，電車係好值得守護嘅文化，又講起團體同電車合作咗多次，最深刻係有間公司以前喺電車軌旁邊，依家就算搬咗，嗰間舖頭嘅老闆都即刻攞咗一張以前間舖嘅舊相出嚟，仲要對此好自豪，覺得香港人對電車嘅情懷真係令人印象深刻，今次合作亦發掘咗好多電車沿線嘅社區人情故事添！
香港電車董事總經理敖思灝仲同一班資深車長一齊切蛋糕，慶祝香港電車嘅生日。敖思灝話香港電車已經歷五代人，係世上現存其中一個最古老嘅交通系統，更係世上獨一無二、仍然喺城市中行走嘅雙層電車，希望做好活化工作咁話。
卓妮