中環出更：何君堯辭任法團義務法律顧問
早前元朗西鐵站爆發暴力事件後，因被拍攝到同白衣人士握手及高舉拇指嘅立法會議員何君堯，令人質疑佢同事件有關連，引起連串風波。身兼律師嘅佢尋日去信屯門大興花園第二期業主立案法團，辭任該屋苑嘅義務法律顧問一職，佢話「鑑於屋苑祥和氣氛不應受到外來政治因素影響」，以保障居民生活安靜，所以作出相關決定。
法團管理委員會尋日向業戶發出通告，指收到何君堯嘅書面通知，辭去義務法律顧問一職，管理委員會已接受其請辭，並感謝佢過去多年來嘅服務。
原定下月表決是否罷免
據了解，有業主促請法團罷免何義務法律顧問，原定會喺八月七日投票表決，但喺通告公布後五日，何君堯喺尋日去信法團辭職。
喺被拍攝到同白衣人士握手惹起外界批評，何君堯曾喺社交網站解釋，當晚只係飯後路過，又曾喺記者會中否認有份策劃同支持白衣人行動，但事後有市民到其位於荃灣嘅議員辦事處抗議，更喺議辦招牌噴漆，並向辦事處掟雞蛋，更有嶺南大學學生要求嶺大校董會罷免何君堯作為校董。
卓妮