中環出更：傳統商家佬變義工甄韋喬做上癮
培養出做義工嘅習慣，唔少學校都會強制學生做服務，但呢個方法似乎令到呢班義工唔係真心服務他人喎。卓妮尋日見到願景基金會主席甄韋喬（Mickey），佢就認為做義工應該要自願，不過開初以服務時數去鼓勵同吸引學生嘗試做義工都唔係壞事喇！
Mickey話學校以學分、服務時數等吸引學生做義工並非壞事，因為可以畀機會學生接觸義工行列，憑參與得多就有機會培養出興趣，當佢哋有一日自願參加就會變成習慣喇！Mickey咁講同佢自身經歷有關，自言當日係傳統商家佬，而現時好似食咗藥咁自動波做義工，都係因為廿年前一定要修讀一個做義工嘅課程，之後就好似上咗癮咁囉，現時仲會同太太、兒子一齊去做義工，其中兒子由細就做義工而變得富有同情心。
高松傑同囝囝父子檔助人
活動係願景基金會就職典禮，基金會多名成員如副主席高松傑、參事余嫿、執委何寶兒等都有份出席，其中高松傑獲囝囝高兆恆到場支持。高松傑就話囝囝下個月就遠赴美國讀書，兩父子都特別珍惜呢段相處時間，更會父子檔做義工，因為希望囝囝貼地，唔好身在福中不知福囉！
余嫿早排就去深水埗探訪基層市民，佢話當時入屋第一眼就見到一把包滿幾卷膠紙嘅風扇，該把風扇比夜冷舖所賣嘅更殘舊，因為基層家庭負擔唔到買風扇嘅費用，直言唔敢想像香港作為物質豐富嘅地方，竟然仲會有咁嘅情況，所以要更加關注基層需要。見到余嫿講到眼紅紅，證明呢段經歷好深刻！
卓妮