政情：怕示威出事 胡炎松提早行商場避人潮

胡炎松話會好早就去行街，通常十一點商場開門，行到十一點幾就即刻走，避開啲人潮，而呢排行吓坑口、九龍塘、又一城同將軍澳等等，都係因為未打交夠安全。咁會唔會戴頭盔？佢話唔會，寧願選擇避開啲人，原因竟然係戴頭盔唔舒服。當問起點睇社會依家嘅情況，佢話其實比起老一輩經歷過嘅嘢算碎料，依家算幸福啦，仲話其實示威OK，但暴力就麻煩，小市民就淨係可以避。

李嘉莉留喺屋企網購

轉頭見到李氏宗親會會長李嘉莉，話平日通常行街會去銅鑼灣同新界，喺風頭火勢之下，只能夠選擇留喺屋企網購。佢話網購通常買日本同韓國嘢，因為可以緊貼潮流，但有時亦買錯嘢，就會送畀人，因為懶得退貨喎。