政情：李浩迅：與其指摘「廢青」不如諒解鼓勵
每個時代都有後生仔，但一講到青年問題，近年就似乎特別多。有「亞洲摺鋁大師」之譽嘅本地藝術家李浩迅，就認為今日嘅社會氣氛同往日有好大差別，導致好多年輕人感到絕望同憤怒，與其指摘後生仔係廢青，不如試吓多啲諒解同鼓勵，或者有機會緩和世代嘅矛盾。
李浩迅嘅成長時期適逢「香港幾好都有」嘅八十年代，唱好未來嘅言論同宣傳充斥各種媒體，當時嘅佢年紀雖小，亦不期然對將來懷有遠景同夢想，反觀今日社會瀰漫着悲觀情緒，儘管係有部分年輕人抗逆能力不高，一味將問題歸咎於他人嘅現象，但亦有唔少年輕人未曾一展抱負，就往往遭人標籤為「廢青」，有如用完即棄嘅汽水罐，難免會感氣餒同失望。
個人抗逆經歷 盼啟發年輕人
點樣扭轉呢種局面？佢話社會應該要多講正面嘅訊息，又以自己經歷人生逆境為例，僅僅一年之內就由事業成功婚姻美滿，驟變至妻子病故錢財盡失，個人頹喪幾至一沉不起，幸好後來有緣細讀幾本勵志書籍，受到內容激勵得以重新振作，所以佢都利用自己嘅藝術才華，出版充滿正能量嘅繪本書籍，期望年輕人都可以從中受到啟發咁話。