中環出更：父女沖繩旅行大放肆 湯修齊一家五口食70碟壽司
趁住暑假，好多政商界名人都同仔女外遊享天倫，而家庭學校合作事宜委員會主席湯修齊（Henry）一家四口同埋岳母一齊去咗日本沖繩旅行，仲締造咗一個奇景。乜嘢奇景？就係同戙高咗嘅七十幾隻碟鬥高嘞！
呢七十幾隻碟喺邊度嚟？咪就係佢哋五個人食咗嘅壽司囉！有網友見到Henry喺Facebook Pose呢張相，亦留言問點食呢？而Henry仲話五個人食咗七十幾碟壽司都唔算太多，有網友仲封咗佢哋做「食力家庭」。其實，Henry早前為咗慶祝兩父女瘦身成功，佢哋一家四口就大解放勁擦壽司，當時一家四口食咗三十幾碟，今次沖繩之旅又刷新紀錄，唔知下次又會唔會又創新高呢？
容永祺孖太太遊百年歷史戲院
香港專業及資深行政人員協會創會會長容永祺早前亦孖住太太去咗英國旅行，佢話同太太好悠閒咁喺公園散步，仲好感嘆咁話喺香港有呢種閒情逸致真係好難。佢仲話每次去倫敦都會爭取睇一套音樂劇，而喺今次嘅旅程中就喺一間有一百零九年歷史嘅戲院，欣賞咗《約瑟的彩衣》音樂劇。
其實，香港演藝學院校董會副主席楊偉誠（Frankie）同太太、資深歌手張德蘭，早前亦展開歐洲購物之旅，佢哋喺巴黎參觀羅浮宮，亦喺巴黎鐵塔之前留影，四周圍搵美食，佢喺Facebook留言，話由於差唔多一個星期冇食過中餐，所以一到倫敦，就即刻同旅居英國嘅細姨一家歎中菜，敍敍舊，仲話開心到不得了。唔單止咁，佢哋仲好好彩買到阿拉丁音樂劇，仲話兩公婆都樂在其中。
卓妮