政情：Greg蘇利益申報無驚喜
蘇錦樑（Greg蘇）趕及喺七一之前升正做商務及經濟發展局局長，同時進身成為行政會議官守成員，依例須要公開個人利益申報資料。佢份申報表近日正式上網，但內容全無驚喜，佢只得一個喺中西區嘅自住單位；而公司同股份利益方面，只有一間用作持有物業嘅公司，同埋以公職身份擔任嘅應科院公司法團董事；其他利益亦只有馬會會員、民建聯成員同智經之友會員三項。
不過話說回來，以Greg蘇嘅政治敏感度咁低，少啲個人利益都係好事，可以大大減低再次撞板嘅機會。
講開Greg蘇，我哋尋日收到一位讀者來函，自稱之前曾經同因病辭職嘅前商務及經濟發展局局長劉吳惠蘭傾談過，話劉太其實私下都好不滿Greg蘇，相信政府搵佢接任只係「冇選擇嘅選擇」。
呢位讀者仲幫呢個夕陽政府諗埋政治危機管理，佢建議政府喺未來一年將Greg蘇困實喺辦公室，唔好畀佢周圍走再次闖禍，等政府換屆時即刻踢佢走喎。