簽經驗新兵帶起隊波 理文新季從生活教起

理文引入了佐迪、列斯奧、李康廉、李瀚灝等具經驗的本地球員，陳曉明冀望他們協助年輕球員成長：「上季我哋球員平均年齡最後生，但正正因為太後生，冇一啲有經驗嘅球員帶領隊波，所以今季簽入佐迪、列斯奧、李康廉，我相信佢哋無論場內定場外，都可以幫到隊波。」他續說：「『康廉』踢到依家仲可以維持到水平，除咗本身有能力，亦關乎佢嘅生活習慣。呢個係我哋搵佢返嚟嘅原因，希望『康廉』喺呢方面感染到其他華人球員。真正嘅職業足球唔係得個半鐘、兩個鐘嘅練習，其他時間都係訓練嘅一種，亦係工作嘅一種，我諗『康廉』可以做到一個模範。」

引入南美新援

外援方面，球隊留用前鋒尼迪利、中場沙普夫，亦引入了前夢想FC中場亞哥斯達，以及巴西前鋒基華尼頓、後衞迪奧高。目前球隊亞援和國援從缺，「曉明Sir」解釋理文未有計劃用盡所有外援名額：「暫時唔會考慮填滿所有外援名額，因為唔想為填滿而填滿，要睇吓自己夠唔夠用，暫時人腳上都夠用，所以暫時唔會聘用第6個外援。依家前中後都有外籍球員，就算本地球員都有佐迪同列斯奧，佢哋填補到我哋做得唔好嘅地方。」

佐迪（藍衫）經驗豐富，理文小將料得益不淺。	理文主教練 陳曉明	新兵列斯奧積極練習。

「曉明Sir」透露，理文今季不但視「菁英盃」為一大目標，還渴望改善聯賽表現： 「上季失分最主要喺上半季，開頭大家都摸索緊，無論陣式、人腳都轉咗好多次，今季有大半隊係上季班底，新球員只係填補空缺，所以今季唔會再好似上季要摸索，留低嘅球員都知道我哋嘅要求，呢方面會比其他球會優勝。上季季尾心態改變導致失分，呢樣我哋都要引以為戒，踢一、兩場好波唔代表啲咩，聯賽最重要係穩定性，希望改變到呢個情況。」

李康廉跟曉明Sir學埋教波

理文今季其中一位具經驗的新兵，便是昔日曾與主教練陳曉明合作無間的快翼李康廉。

繼和富大埔、天水圍飛馬後，再次與「曉明Sir」合作，「康廉」坦言：「自己好開心可以再同『曉明Sir』合作，因為佢好了解我、好了解我嘅踢法、好了解我嘅性格，今次我過嚟理文，其中一個原因就係想跟番佢，喺佢身上學踢波之餘，仲學到點教波，好好增值自己，將來轉型做教練都有用。」球隊擁有多名年輕球員，現年35歲的「康廉」期望：「我唔會教隊友踢波，但我會分享經驗，互相交流意見。」

謝朗軒再加盟期望更大

至於再度從東方龍獅外借加盟、能出任右中場和右後衞的謝朗軒則稱：「再次加盟理文期望更加大，球會配套、訓練模式、教練團隊更加專業，希望整體發揮得更加好，球隊上番正軌之後攞到好成績，甚至冠軍。至於自己嘅目標，就係爭取更多出場時間，上季喺東方龍獅大部分時間做後備，少咗機會證明自己，希望今季證明到自己，並得到香港隊教練同球迷關注。」他亦表示非常期待首次與陳曉明合作，盼望能擦出火花。

圖/文：陳焌鏗、何彥霆