中環出更：支援癌症病人小組取消訪台
立法會外訪甩轆未能成行都有前科，今次就到立法會支援癌症病患者事宜小組委員會。小組委員會原定九月二十四至二十七日去台灣進行職務訪問，但最終只有四名議員同意，因為人數太少，所以就去唔成喇。
22人僅4人同意前往
話說立法會衞生事務委員會邀請議員就小組委員會去台灣外訪表達意見，結果直至限期，二十二名事務委員會成員中，只有四人表示同意小組委員會去台灣，七人就話冇意見。由於支持小組委員會去台灣嘅人數唔夠一半，事務委員會主席陳沛然同小組委員會主席蔣麗芸（Ann）就同意唔會進一步尋求立法會內務委員會批准有關外訪，台灣之旅只能取消。
Ann就話，暫時去唔成外訪的確係好可惜，唔知係咪因為立法會冇乜人返工，所以冇人覆。佢又話，立法會秘書處都有提醒，就算事務委員會通過，都要提交內會審批，估計最近內會都好難開到會，希望下個會期可以再處理，但都要睇吓係咪可以同病人組織夾到時間一齊去喇。不過佢認為，台灣有關減少乳癌嘅經驗好成功，真係好值得小組委員會去睇吓咁話。
卓妮