中環出更：迷你影院興起鄧國樑懷念舊日風味
年輕人拍拖活動都離不開行街、睇戲、食飯，對仁濟醫院總理鄧國樑嚟講，睇戲都係拍拖節目之一。對於近年迷你戲院嘅興起，大型戲院已經買少見少，不過鄧就話，雖然新型迷你戲院設備齊全，但係舊日嘅大型戲院仍然具有一股今日迷你戲院所欠缺嘅風味。究竟係乜嘢風味呢？
話說善德基金會日前首次舉辦電影慈善首映，以籌募善款支持青年工作，而當晚嘅電影就係分開喺幾間迷你戲院播放嘅，令鄧國樑不禁諗起往日喺大戲院睇戲嘅時代。佢話，以前最常幫襯嘅大型戲院喺旺角同尖沙咀。依家迷你戲院興起，大型戲院已買少見少，佢就覺得，新型迷你戲院雖設備齊全，但舊日嘅大型戲院就有另一番風味，例如大戲院通常於售票大堂設置一部同成年人身高相若嘅投幣式磅重機，唔少等候入場嘅觀眾都會畀一元，以換取一張印上自己體重嘅小紙卡，呢種舊戲院景象依家已消失無蹤。
善德基金會主席董吳玲玲同老公董中浩當晚都在場。董中浩就話，對往日賀歲片上畫盛況歷歷在目，試過年三十晚去戲院，打算購買即場戲票同屋企人睇戲度歲，點知一到埗就被戲院嘅購票人龍嚇一跳。不過近年盛行網絡售票，相信為咗睇賀歲片而排隊購票嘅場面應該一去不返喎。
蔡敬業：科技發展速度驚人
依家唔使入戲院，用電影光碟都可以欣賞電影。善德基金會總理蔡敬業話，電影儲存裝置於短短三、四十年間，已由初時嘅雷射碟，一路演變為VCD、DVD同藍光碟，依家更只需於網絡下載就可觀賞，可見科技發展速度實在驚人。雖然透過網絡下載來觀賞電影係方便快捷，不過蔡就相信，影迷要收集心愛嘅電影系列，光碟仍然係最好嘅方法咁話。
卓妮