修訂《逃犯條例》衝突持續咗個幾月，差唔多每個禮拜六日都有遊行示威，爆發衝突嗰時又會出現唔同「戰線」，巴士作為主要道路交通，成日都要改路或者取消。聽聞九巴近日成立咗個「War Room（心戰室）」，集結晒各部門代表，日日傾要點拆掂條臨時路線，成個「軍機處」咁款，依家一有衝突，九巴每隔一、兩個鐘就會更新一次改道安排，方便市民唔受影響。
九巴方面就話「War Room」集結咗負責交通策劃、車務、傳媒通訊同社交媒體等等嘅同事，本身成立個目的其實主要為咗上年個強颱風「山竹」，當時佢哋因為覺得颱風對交通影響好大，想整個心戰室應對天災，順便計劃埋大型節日嘅交通安排，點知整好冇幾耐就爆發修例風波，暫時未為颱風服務過一次，就要日日為示威遊行安排改道。
佢哋又透露，雖然「War Room」同事每次遊行示威前都做好兩手準備，估計影響情況等等，但未必次次估得中條「戰線」喺邊，好彩有提前借調其他區嘅車務助理落現場觀察情況，協助車長行車，盡量保持到班次咁話。