政情：何君堯開會場地密密搵 譚文豪寸刷存在感
立法會早前受到反修訂《逃犯條例》嘅示威者猛烈衝擊，被搞到爛蓉蓉，無法開會而被迫提早放暑假。其實，好多事務委員會已取消會議，唯獨環境事務委員會仍擺上日程，定喺今日召開會議，原來委員會主席何君堯仍努力搵地方開會，身兼委員嘅譚文豪（Jeremy）就明寸何君堯刷存在感。點知秘書處尋日就出新聞稿，公告會議取消嘞！睇嚟都係搵唔到場地，無功而還嘞！
Jeremy前日喺Facebook貼文，話翻查立法會日誌，喺今日上午十時四十五分仍然有環境事務委員會會議，所以特別向秘書處查詢，又引述秘書處回覆，話主席何君堯仍然努力搵緊地方開會，所以暫時並未取消會議，但目前仲未有任何議程同文件畀議員。
跟住佢仲hashtag咗幾句，話立法會主席梁君彥同財委會主席陳健波都搵唔到地方開會，有啲人真係好鍾意刷存在感，依家咪兜都喺立會外，係咪要為你何君堯開先例，喺立法會以外地方開會？擺明係寸何君堯喇！
秘書處新聞稿指會議取消
本來立法會日誌早兩日仲顯示環境事務委員會今日有會議，但尋日已經消失咗，而秘書處喺尋日下晝更加出新聞稿，話有關會議取消。