中環出更：葉劉評分降至2.65 成跌幅最大議員
身兼行政會議成員嘅新民黨立法會議員葉劉淑儀（葉劉）早前力挺政府修訂《逃犯條例》，政府「跪低」宣布暫緩修例後，葉劉被點名要求辭去行會成員職務。有最新民意調查結果顯示，受訪者對葉劉嘅評分為二點六五分，較上次同類調查大跌零點三九分，成為評分跌幅最大議員。葉劉喺議會內冇乜助力，好似單打獨鬥咁，唔知幾時先追番落後嘅分數？
香港研究協會喺上月十九日至本月九日訪問咗一千多名市民，調查市民對議員表現嘅評分，以一分為最低分，五分為最高分，發現市民對全體立法會議員監察政府工作、議政能力及整體工作表現嘅評分分別係二點零七、二點零二及二點零六分，三項評分都下跌。個別議員方面，以葉劉評分跌得最多，較舊年十一月至十二月進行嘅調查跌咗零點三九分，不過都仲係港島區最高分嘅議員。而同屬新民黨嘅新界東議員容海恩評分為二點一一分，亦下跌零點一五分，繼續係當區最低分嘅議員。
機構籲檢討工作 積極獻策
調查機構話，結果顯示市民對絕大部分議員嘅評分都係低於三分嘅一般水平，反映唔少議員嘅表現都未能符合市民嘅期望，機構仲呼籲班議員要認真檢討工作上未達完善之處，積極為本港走出困局獻計，爭取多啲市民支持。不過，似乎葉劉應諗計幫自己走出民望下滑嘅困局先喇！
卓妮