政情：傳湯家驊接替鄭若驊 政府恐捉老鼠入米缸
因「放生黎智英，唔告梁振英」而捱轟嘅律政司司長鄭若驊民望長期「墊司底」，今次政府修訂《逃犯條例》，佢亦未有做好解說工作，成為「避政司司長」，撤換鄭嘅聲音不絕。近日有傳政府一旦踢走鄭，退出公民黨（公文袋）後轉軚成為建制一員嘅行政會議成員湯家驊或會接任司長一職，如果係真嘅話，政府呢鋪真係捉老鼠入米缸喇！
湯家驊嘅臭史真係一匹布咁長，而佢同鄭若驊嘅共通點就係都曾被揭發寓所涉僭建。一一年佢仲係公文袋立法會議員時，被踢爆其位於大埔康樂園嘅豪宅單位涉嫌僭建玻璃屋。當時佢一度引用自己有份打過嘅一單僭建官司，死撐話玻璃屋屬豁免規管類別，之後其他法律界人士同屋宇署就指證出錯，佢先話係一時記錯案例，向公眾致歉同承諾清拆僭建物，真係（火羅）到爆。
被批政界變色龍
喺一五年立法會未能通過政改方案之後，湯就退出公文袋並辭任議員，之後成立行中間路線嘅民主思路，即被泛民唾棄。至前年現屆政府上場，佢更被委任為行會成員，成為建制一部分，隨即被人批評係政界變色龍。
湯亦貫徹兩頭擺嘅作風，如政府修訂逃犯條例，佢過去一直撐修例，但喺上月示威者包圍立法會後就改口風，話政府可考慮唔即時通過修例，其後政府宣布暫緩修例。如果政府真係委任佢接替鄭出任司長，真係隨時自己攞嚟衰。