政情：陳沛然撰文自白 稱中間派唔等同中立
立法會醫學界議員陳沛然向來自稱中間派，加入議會初期曾加入晒泛民同建制派兩邊嘅通訊群組，但亦曾經出現兩面不是人嘅情況畀業界鬧爆。佢尋日就寫網誌大談中間同中立完全唔同，似乎要為自己辯護喇！
認中間偏黃 不礙醫生工作
陳沛然話自己分別有醫生同議員兩份受薪工作，前者要保持中立，但後者就無可能中立。而佢每星期有廿幾個鐘返醫院同診所，期間只會專心照顧病人，而現實嘅病房中有示威者、警察、罪犯，作為醫生都會一視同仁。
至於返回議會就無可能中立，因為無可能每次投棄權，亦無可能唔公開發表個人意見，但佢因為唔同意立場先行，所以兩邊陣營都唔加入，以身體力行做「不要立場先行」。佢更強調唔同意二元分類法，亦重申喺二○一六年參選時已公布自己中間偏黃，喺政治上從無講過中立，所以中間派唔等同中立，而做議員都無可能中立，自己受薪就要投票同埋表態喎。