政情：離開立會受阻礙 梁美芬慘被包圍兼的士拒載
立法會議員梁美芬尋日喺立法會外開完記招離開嗰陣，畀民陣副召集人陳皓桓、成員洪俊毅同幾名人士跟住同包圍，途中更被不停指罵，而上的士離開又被拒載，被指係敗走，梁美芬事後喺Facebook貼文強調唔係敗走，仲鬧番包圍佢嗰班人阻住佢離開，仲郁手郁腳添！
陳皓桓等人包圍梁美芬期間，好大聲咁叫「成立獨立調查委員會徹查612事件」，又想同梁美芬理論。梁美芬就用英文反問佢哋係咪中國人 、識唔識得咩叫法律？ 陳皓桓等人就話「我哋係香港人」、「你憑咩做香港人嘅議員」。
強調非敗走
被包圍嘅梁美芬行到去中信大廈對開一段行人路，諗住上的士離開，但上車後被司機拒載，落車行番出嚟，佢話：「你咁樣會嚇親人」，之後喺大批記者同市民跟住嘅情況下行入中信大廈，佢又反問陳皓桓「知唔知咩係言論自由」、又話「唔好再搞野喇，害死一國兩制！」陳亦有即時反駁。梁美芬最後喺助理同立法會職員協助下返入立法會，整個被包圍過程歷時至少五分鐘。
梁美芬事後係Facebook貼文，直指「唔識法律嘅人點可以同佢哋傾偈」，又強調當時自己唔係敗走，而係包圍佢嘅人係阻住佢離開，仲要郁手郁腳，強調自己唔係敗走。