政情：隻身走出政總 楊偉雄無人認出
日前有大批示威者闖入立法會大肆破壞，附近一帶頹垣敗瓦恍如踏入電影「明日之後」嘅場景。尋日中午時分，創新及科技局局長楊偉雄手持公事包獨自步出政府總部，沿路同市民同民主派議員朱凱廸擦身而過，局長都無人認得到，最後喺傳媒追訪下楊偉雄敗走至港鐵站乘車離開。
雖然楊偉雄同修訂《逃犯條例》似係大纜都扯唔埋，但身為問責官員之一，政府施政咁「離地」，佢都有一定責任。當問及點樣睇修例、未來施政會有乜改變同埋今日去政總係咪開會等，佢一概無回應，耍手微笑離開。能夠喺時下局勢隻身走進人群，佢都算得上係勇氣可嘉嘞！
朱凱廸擦身零反應
值得留意嘅係，呢位見過蘋果公司已故創始人Steve Jobs（喬布斯）嘅局長，喺公眾地方毫無存在感，連朱凱廸同佢擦身而過時，都零反應。當楊偉雄去到金鐘海富中心時，眼見太多傳媒包圍，焗住走落港鐵站，講咗五分鐘電話就用八達通嘟卡入閘，過程十分順利。