政情：董建華敷衍落實一國兩制 Hea做特首種禍根

近日香港政局混亂，連莊嚴嘅立法會大樓都可以遭受示威者嚴重破壞變得滿目瘡痍，而政府近期就修訂《逃犯條例》又多番「跪低」，唔同政府部門先後遭到示威者佔領同圍堵，遊行集會更爆發激烈衝突，令各界都質疑政府已淪為「跛腳鴨」，政府權威可謂徹底摧毀。雖然坊間對現屆政府不滿，但董建華作為回歸以來唯一一名任內辭職嘅特首就有另類睇法，唔知係咪因為同情心作怪而選擇護短喇！

董建華尋日選擇性地與部分傳媒高層閉門會面，據報道指佢為林鄭月娥護航，認為林鄭已經承認有不足同道歉，相信之後會做好工作，仲明言換特首解決唔到問題喎。既然換特首無助解決困局，咁點解佢當年又要腳痛落台呢？呢番說話出自董建華之口真係零說服力囉！

通識教育失敗 衍生佔領等亂局

據報，董建華喺會面中都承認，任內推行嘅通識教育係導致年輕人出問題嘅重要原因，形容通識教育係失敗。雖然肯認衰，但已經恨錯難返，事關通識科點止一次被指係大型社會運動嘅根源，過往連立法會議員都猛烈抨擊，認為要改革通識科，避免老師有機會宣揚偏頗主張。而二○一二年嘅反國教風波、二○一四年為時七十九日嘅違法佔領行動，都有政界人士歸咎於通識科，計落今時今日嘅亂局，都係因董建華當日種下禍根而起。

家族生意售中資 被疑搵國家着數

董建華嘅家族生意曾陷破產邊緣，靠中央出手渡過難關，他後來成為特首，理應維護一國兩制，卻Hea做七年，只顧家族生意，前年決定甩手賣畀中資，他過往被質疑靠「一國」而搵國家着數，「兩制」方面亦敷衍了事。

其實董建華任內都係劣迹斑斑，九七年甫上任就宣布興建八萬五千個住宅單位，但冇耐即遇上金融風暴，樓市應聲下跌，出現大批負資產業主，港人已累積一定怨氣，及至○三年爆發沙士，加上政治上激發五十萬人上街，最終痛腳下台，依家佢竟然開腔幫林鄭月娥，真係唔知會否變死亡之吻！