中環出更：自嘲旅行危險品 鄧鉅明靠老婆𥄫實
香港人工作壓力大出晒名拚搏，一有時間都想去旅行放鬆吓，卓妮日前喺沙田馬場見到太子珠寶鐘錶集團主席鄧鉅明，問起去旅行有乜深刻嘅事時，佢笑住話通常去旅行都係老婆安排，永遠都係very good，就算唔好佢都唔夠膽出聲。咁有冇試過危險遭遇？佢話危險性嘅嘢就係自己，老婆點都會𥄫住佢，永遠都唔可以離開佢視線範圍之外喎。
轉頭見到杭州旅港同鄉會常務副會長沈墨寧，原來佢同朋友早前去西班牙旅行，一落機朋友就畀人偷咗兩本護照，幸好護照同銀包分開擺，所以冇財物損失，隨後朋友立刻到中國駐西班牙大使館求助，兼打電話返香港入境處email番證明文件去中國大使館，兩個鐘內出番本臨時證件，仲話外地有乜事中國大使館幫到你。
自駕遊美 吳清煥雨中歷險
同場仲見到香港中華廠商聯合會副會長吳清煥夫婦同保良局副主席陳正欣同太太。吳清煥話早幾年去北海道參加一個豪華團，但入住嘅酒店唔喺旅行團所講豪華酒店，當時有啲失望，殊不知回港後旅行團主動寄番一張支票畀佢，補番酒店級數差額。
吳清煥仲透露咗一次驚險旅程，話說佢喺美國自駕遊時突然落滂沱大雨兼雷電交加，路都望唔清，當時喺公路上行駛緊，見到好多私家車都停喺路邊唔敢行，但佢要趕去華盛頓，事關Book好酒店趕住時間攞房，所以一步一驚心，要慢慢揸車，好彩當時前面有架大貨車行駛緊，貨車轉左佢又轉左，貨車直去佢又直去。點解呢？佢話架貨車喺當地車，熟悉當地公路，跟住架貨車行就一定冇死，事關十足導航一樣。
卓妮