政情：主席咪加告示 廖長江警惕勿亂吐真言
成日都話真嘢唔好攞出嚟講，但以往唔少議員都試過喺冇熄咪下，講咗啲比正式發言更令人難忘嘅言詞。立法會福利事務委員會主席鄺俊宇尋日開會時，發現主席台嘅咪高峰貼咗紙，提示綠燈亮起時就會收音，形容秘書處好體貼。為乜有貼紙？原來係應建制派班長、商界議員廖長江（Martin）要求做嘅。
回帶至本月中嘅國歌法法案委員會，當日同時間仲有兩個會開會，泛民搞搞陣狂點人數，玩到班議員陀陀擰周圍走，喺其中一次點人數期間，Martin喺冇熄咪下向委員會副主席張國鈞講︰「流一流國歌法我都冇乜所謂，等啲人警惕吓囉。」雖然係吐真言無乜錯，但Martin事後都要解畫。
立法會秘書處回覆查詢時承認係按Martin嘅建議，又考慮到委員會主席或主持會議嘅議員時有需要諮詢身旁嘅副主席、秘書或法律顧問意見，故近日喺會議室1、2同3主席座位嘅咪高峰增設手動開關功能，並貼上使用說明。
