中環出更：電子工程結合務農 梁明堅：無諗過可以咁用
香港本地農業極少，幾乎冇年輕人會立志投身農業，就連自細已經鍾意園藝嘅元朗區議員梁明堅（Jason），尋日出席華南農業大學建校一百一十周年嘅活動時都話，雖然佢依家同爸爸梁福元喺元朗有個有機生態園，但佢最初都冇諗住務農，當年喺英國讀書都係讀電子及電機工程。聽落似乎同農業冇關係，但Jason就話，其實控制溫室溫度同濕度嘅儀器都會用到電子工程知識，只係佢當年讀書時冇諗過可以派上用場咁話。
香港成日打風，務農似乎都好大風險。梁福元就話，種植一定要揀適合水土氣候生長嘅植物，例如佢園內唔少果樹都受得住颱風，但政府之前種好多相思樹、木棉花等就係種錯喇，唔單止搞到部分市民會敏感，去年颱風山竹襲港，仲搞到冧晒添，認為應該種植大葉紫薇、櫻花樹呢啲冇咁易斷嘅品種喎。
沈豪傑：香港需要本地產品
同場仲有元朗區議會主席沈豪傑（Wilson）、十八鄉鄉事委員會主席程振明、香港華南農業大學校友會會長曾贊安、深圳市華南農業大學校友會繼續教育學院分會會長馬冬梅。Wilson都覺得香港需要一啲本地生產產品，因為單靠進口嘅話好易受商業因素影響，早前畜牧業就因為爆發豬瘟而大受影響，若有本地出產嘅話，影響就可以減輕喇。不過Wilson都明白本港地少人多，難以自給自足，所以佢就認為未來農業發展應該同創新科技結合，等本港可以成為農業科研基地，相信呢種發展模式可以吸引到多啲年輕人投身農業。
而程振明就認為，唔係香港冇人有意投身農業，而係政府嘅政策有時未必配合得到。十八鄉都有好多農地，唔少人都想耕種，不過就成日因為土地用途限制、寮屋政策等問題而用唔到，結果好多地都荒廢。佢仲話，本港人才同技術都有，希望可以同政府反映下喎。
卓妮