中環出更：文本錯處逐個捉 民主派玩殘秘書處

更正雞毛蒜皮嘅事

過往內會會議並唔需要逐字紀錄，不過因為民主派玩嘢，之前就喺會上提出呢個要求，秘書處都有配合。但日前就有十四名民主派議員喺逐字紀錄文本「搵錯處」，仲去信內會要求更正，但當中不乏雞毛蒜皮嘅事項，例如秘書處紀錄咗議員梁美芬講咗句：「我希望主席你嚴格主持會議。」議員尹兆堅就去信指，梁當日係用「執行」，而唔係「主持」，要求秘書處更正。

另有多名議員要求秘書處寫番清楚省略咗嘅議員發言，例如議員郭家麒指出議員林卓廷有句「嘩！呢句好離譜喎！」議員譚文豪就指出議員陳志全曾講過「收聲啦！」認為秘書處唔應該用一句「議員在席上高聲說話」就帶過。呢啲說話多數都唔係發言重點，民主派要求寫明其實意義不大，不過就玩殘秘書處，令秘書處做餐死喇。

卓妮