政情：開會為盧偉國護航 馬逢國話唔係偏幫
工程界不停鬧爆民主派拉布，搞到政府工程撥款慢，影響業界嘅生計。立法會工務小組委員會尋日開會，新民主同盟范國威（Gary）喺會上鬧爆委員會主席盧偉國（WK）蠱惑、陰濕，激到WK疊晒聲反駁話批評唔妥當同唔接受，而同屬建制派嘅「六人組」馬逢國不惜劃清界線，竟然爆咗句唔係同WK特別老友嚟幫佢護航，話要捍衞主席嘅權威同尊嚴喎。
話說過往喺工務小組同人事編制小組委員會上，當有議案通過後，委員會主席都會諮詢委員相關議案有冇需要喺財務委員會上分開表決，好多時就算主席未問，都會有議員舉定手提出要求。Gary尋日就喺會議上話，之前喺通過元朗橫洲公屋發展項目後，WK冇問到委員有冇需要分開表決，要喺會議結束時先提，搞到議員錯失機會。
范國威大鬧WK陰濕講大話
當WK一聽到Gary嘅言論就即刻解釋，話委員係可以有呢個權利，而且好多時唔使提示，都會有委員要求分開表決，仲話喺會議完結時再作出提示係慣常做法，自己好多時都會咁做添！Gary亦唔執輸，即刻提出規程問題，又講番慣例，仲鬧爆話WK講大話，搞到WK即刻好激動咁再次疊聲反駁話Gary，話自己冇講大話，仲話Gary胡亂批評、啲指控係侮辱，要求佢收番之餘，仲叫佢睇番會議紀錄。
隔咗一陣，同樣係民主派嘅人民力量陳志全就幫口，話Gary係期望WK可以喺每個項目完成審議後都問，仲建議確立規則，等大家互相提醒，無謂有爭拗。WK回應時就話會聆聽意見，但就再重申話唔接受Gary批評主席陰濕、蠱惑，仲話係冒犯添！
劉國勳夾攻話指控唔公道
隨即建制亦幫口，劉國勳同馬逢國就異口同聲咁護航，劉國勳就話每次都聽到WK問係咪分開表決，話Gary嘅指控係唔公道。而馬逢國就聲稱同WK唔係特別老友，認為Gary嘅指控係針對WK，仲話唔可以容忍呢種對主席嘅冒犯，要捍衞主席嘅權威同尊嚴添！無啦啦話同WK唔係特別老友，好明顯係想劃清界線，話畀人聽唔Friend都撐，即係WK冇做錯喇！
唔知係咪前車可鑑，有民主派議員就喺發言期間提出要分開表決。同時建規界謝偉銓仲要求喺工務小組已經要分開表決添，但佢就係因為不滿政府喺西九文化區藝術廣場行人天橋項目上「老屈」建築師，所以先投反對。