中環出更：辦野外探索之旅 黃添福激發學生自理應對
依家啲小朋友受到家長高度保護，點樣先可以令佢哋衝出溫室成長呢？仁愛堂副主席黃添福就難忘當年喺澳洲求學時，有機會走入森林，體驗遠離城市文明嘅原始生活，激發學生自理能力，佢認為本地青少年都應該嘗試吓。
黃添福憶述當年喺澳洲讀到中三左右，學校安排學生到墨爾本郊區嘅森林，進行為期兩星期嘅郊遊活動。最令佢難忘嘅係老師會駕駛車輛，將隨身只得睡袋同小量食物嘅學生，逐個帶到唔同嘅野外地點，唔准用電話同外界聯繫嘅情況下，喺野豬同袋鼠出沒嘅地帶獨自度過廿四小時。佢話遠離文明嘅情況下，喺森林所遇到嘅一切狀況都要自己想辦法去解決，而呢種係有助激發學生自理能力嘅野外體驗。
咁啱仁愛堂喺今年暑假舉辦以學生為對象，為期兩周嘅馬達加斯加探索之旅。有份負責呢個項目嘅黃添福話雖然參加者都會集體行動，但深入不毛之地探索當地特有生物，其挑戰性同佢當年喺澳洲嘅森林體驗可謂不遑多讓，而在場嘅香港大學生物科學院首席講師侯智恒博士同助理教授宋亦希博士都好支持呢次探索之旅。
連卓鋒推藥劑師到戶服務
喺關顧長者方面，仁愛堂主席連卓鋒表示有時長者會唔記得食藥或自行改變劑量，為免醫療效果事倍功半，佢哋將會推出電話提示，同藥劑師到戶服務，提醒長者「夠鐘食藥喇」！總理姚宇翔就話見過屯門區僅得百呎面積嘅出租單位，租金儼如巿區般高昂，而佢哋首個「社會房屋共享計劃」，基層家庭就能夠以可負擔嘅房租，享用合理嘅居住空間嘞！
卓妮