政情：八網難逃：田二少雙喜臨門 添孫打孖嚟
民主派玩嘢，同建制派大鬥法，正當立法會立立亂之際，議員田北辰（田二少）有喜事臨門喎。事關佢再添孫，仲係打孖嚟添！
趕得切齊慶母親節
田二少尋日喺社交網站Facebook上載咗張相，背景係醫院嘅BB房。佢貼文話今日真係好開心，事關孫仔孫女出世，仲係龍鳳胎嚟o架，係姐姐同細佬。咁啱嚟緊嘅周日就係母親節，佢就寄語孫仔同孫女嘅媽咪要好好休息，同BB過第一個母親節咁話，又大讚媽咪永遠係最偉大嘅。
o架張相仲見到田二少係舉起V字手勢，究竟係想講龍鳳胎出世係Victory（勝利）抑或係代表多添兩個孫呢？相信兩樣都係喇，佢數數手指，依家已經有五個孫嘞！