政情：跳舞慢半拍 蕭偉強自認「甘草」

赤柱放閃打卡 羨煞網友

赤柱係香港嘅旅遊景點之一，但近排就變得好冷清，就連喺小市集嘅好多商舖都捱唔住執笠。赤柱由昔日嘅旅遊熱點變咗冷點，蕭偉強兩公婆揀呢度放閃，唔通係貪人少可以清靜啲，抑或係想幫手救吓赤柱，谷吓旅遊業呢？

係乜嘢原因就唔知嘞，但不變嘅係蕭偉強將呢張放閃嘅相上載喺Facebook之後，就惹嚟大批網友熱議。張相係佢兩公婆喺赤柱海旁拖住手，戴住黑超對望，唔少網友話佢哋好甜蜜，羨慕死人。

有網友更貼文寫住「青青河邊草」（呢首係六十年代粵語片嘅經典歌曲），蕭偉強即刻回應話：「是。我和太太都是那年代。是甘草。」之後有網友叫佢快啲約太太去跳A-go-go（當年最潮嘅舞步），佢就話：「修哥（胡楓）就得。我頂多跳慢四，仲要慢半拍。」係咪真o架？跳嚟睇吓先知喎。