政情：宓琪其家鄉百畝地 水果春筍任摘
喺啱啱過咗嘅復活節假期，好多人都出埠旅遊，新青會副會長吳聖傑（Terri）都趁女兒嘅學校放長假，同太太宓琪其（Kiki）返去杭州老家探外父。Kiki爸爸住嘅別墅附近有自己嘅一百多畝土地，上邊有茶園、果樹同竹園，所以今次返去日日陪爸爸去山上行吓，適逢春筍嘅出筍期，自摘任食，呢種田園生活真係令住喺石屎森林嘅香港人羨慕喇！
陪爸爸逛街市行山
Kiki話嗰座山距離住所大約十分鐘路程，平時茶園出產嘅龍井茶、竹筍同各種水果，都由得附近鄰居隨意摘嚟食用，屋企嘅廚師如果想煮竹筍就隨時去掘。今次佢哋返去主要目的係陪爸爸，所以都改變咗喺香港夜瞓嘅習慣，朝朝六點就起身，陪爸爸食吓早餐，去街市同埋山上行吓，然後返屋企食晏、瞓晏覺，享受難得嘅慢活節奏。
Terri就話當地群山環抱，日日好似做緊「森林浴」，吸收樹木釋放嘅芬多精及負離子，病痛都少啲喇！