政情：蔡若蓮返工前睇書平靜內心
唔少人都有閱讀習慣，曾經做過校長嘅教育局副局長蔡若蓮當然都有呢個習慣，更誇張到每日返工前都要逼自己睇書添！
蔡若蓮尋日出席一個與閱讀有關嘅活動時，話讀書能夠令人心靜，所以每日返工開電腦同手機前，都會強迫自己先睇書，因為愈忙會愈亂，要先靠睇書令自己定落嚟先開始一日嘅工作。
抄低好句送畀朋友
佢又話睇書好似為自己內心照鏡，習慣抄低有意義或啟發性嘅句子，將呢啲句子送畀朋友或記錄喺日記中，再隔一排睇番就會更了解自己嘞！佢又話年紀愈大就愈要閱讀，因為會少咗願意提點自己嘅朋友，惟有去依靠書本呢個無言、最忠誠嘅朋友，去幫助自己成長，佢自言開始上年紀，所以都一樣需要閱讀、提點，仲要儲備可以同其他人分享嘅故事喎。