政情：彭耀佳想吸穆斯林旅客來港
近日斯里蘭卡發生連環爆炸襲擊事件，懷疑係穆斯林組織背後策劃，旅發局新主席彭耀佳尋日首度同傳媒茶敍，就話今年想吸納多啲穆斯林國家嘅旅客嚟香港。咁有冇「風險」呀？佢話旅客係嚟旅遊，如果嚟搞事可以偷渡或者用其他方法同身份入境，旅發局推唔推廣旅遊，搞事者都會嚟咁話。
彭耀佳喺今個月上任主席，佢話呢樣係無償工作，有時仲要付出，但每個人都要回饋社會，令香港更好。佢仲話做旅遊推廣同商業推廣一樣，吸引客源，提升銷售額，政府畀合理嘅成本，經濟得益就畀巿民，旅遊好，經濟就好，就業機會亦提高。
至於有冇推高客源嘅壓力或新目標？佢就好輕鬆咁話無，「set」（定）個目標係無意思，首要反而係吸納高增值、肯花錢而逗留時間更長嘅旅客，如果佢哋每人肯花一萬蚊消費，總比吸納低消費客群對香港更具經濟效益。
多美食靚景 鍾意遊日
講開旅遊，佢同大部分港人一樣鍾意去日本旅遊。點解？佢話日本有四時景色同美食，又安全，服務態度又好，但香港嘅服務態度就有改善嘅空間，係咪應該再搵人拍多個宣傳服務態度嘅短片宣傳下呢！