政情：港大民研壽終正寢 鍾庭耀另起爐灶撲水

鍾庭耀尋日召開有關港大民研未來發展嘅記者會，公布會將港大民研獨立於港大並易名為「香港民意研究所」，今年七月一日將舉辦第一個公眾活動。佢又透露，本身已延長咗退休年齡，呢段期間亦同港大社會科學院院長討論港大民研嘅未來，傾過唔同方案後，決定以完全獨立於港大嘅新機構模式走落去，而佢屆時亦會離開呢個由讀書到工作結緣四十幾年嘅地方，強調係「無怨、無恨、無悔」。

公布調查結果撞記者會 甩轆致歉

決定另起爐灶，以私人機構提供民研服務，經費一定係首要問題。鍾庭耀講明轉型後要社會資源支持先維持到唔收費項目，例如政府民望、官員評分等，日後呢類活動就要問市民想唔想繼續，希望嘅話就要有所付出，所以需要進行眾籌，而現時就以六百萬元為目標，用作啟動同成立研究所，之後就自負盈虧。

其實研究所已喺今年二月註冊，下月四日正式營運，雖然面對資金問題，但佢強調要貫徹誠信同品質嘅理念，肯定唔會為五斗米而折腰咁話。

然而，港大民研呢頭預告解散，鍾庭耀又宣布要為將來撲水，轉頭就致歉咁失威，事關原定尋日公布「五大行政會議成員評分」結果，但因同記者會撞時間而要讓路，押後到另行通告。

曾被批偏幫泛民 惹身份認同爭議

港大民研由九十年代初成立，期間惹起唔少爭議，例如喺二○○○年七月爆出時任特首辦高級特別助理路祥安向港大施壓，要求停止進行對政府同特首民望嘅民調，之後亦曾被親中人士抨擊民研偏幫泛民，又曾引發身份認同爭議等，而佢帶領港大民研脫離港大之後，係咪會繼續咁惹火？大家要拭目以待嘞！