中環出更：粉紅Look開工 陸頌雄唔覺姣

Michael話老婆同阿仔返鄉下拜山，攞晒屋企啲篋，於是佢就帶住老婆嘅粉紅篋去考察，仲要唔係好為意咁話「都係篋一個」。咁佢帶住個粉紅篋有冇尷尬，佢就突然自爆自己有好多粉紅色衫，「幾型呀」！唔怕畀人話你姣咩？佢話唔驚，仲有着落區，啲人都會問佢「粉紅色喎」，佢就會答都幾好睇吖，其實有時啲街坊仲新潮過佢添！

波哥戴黑超防眼疾

轉個頭立法會財務委員會主席陳健波（波哥）就帶住副黑超，話可以喺陽光下保護眼睛，可以預防眼疾，自己一出街就戴住副超，已經戴咗廿年，呼籲長者出街都戴喎。佢仲有個太陽眼鏡架可套落去副眼鏡度，睇落好似滑雪嗰啲眼鏡咁，但太太覺得副鏡架好肉酸，叫佢戴番普通太陽眼鏡喎。

財經事務及庫務局局長政治助理楊寶蓮（Pauline）今次都有隨團，唔知有冇帶乜嘢特別裝備呢？佢話都係帶防曬同化妝品，不過今次有兩個飯局要着正裝，所以都有帶定啲外套，亦着定皮鞋。佢話今次係第三次跟局長出Trip，希望盡量幫到手啦！之前有議員批評佢溝通唔夠，會唔會藉呢個團打好關係呢？佢就話一路都有同議員保持溝通o架，留意到議員嘅睇法，會再多啲溝通，希望今次一齊考察可以同議員再熟啲啦！

卓妮

陳健波（右）戴住副超咁有型，另一議員林健鋒（左）即刻捉住佢影相。

楊寶蓮話希望今次一齊考察可以同議員再熟啲。