中環出更：史立德飲酒底線：要識返屋企瞓
每個人飲酒都有好多唔同嘅理由，之但係飲酒過量對身體有損無益。香港國酒茅台之友協會（協會）早前搞聯歡晚宴，香港中華廠商聯合會副會長史立德都有去捧場，佢話飲幾多酒都好，底線係飲完之後必須識得返屋企瞓覺。
協會監事長楊孫西推廣茅台不遺餘力，而晚宴嘅賓客當然要飲番兩杯茅台喇！史立德話以前係飲啤酒嘅，但年紀大咗，飲完啤酒之後，翌日會頭痛同個胃會唔舒服，所以佢就唔再飲嘞！問佢未有醉駕法例之前，有冇試過飲酒之後揸車？佢斬釘截鐵話冇，仲話唔好累己累人，所以要揸車就一滴酒都唔飲。
講開飲酒嘅經歷，史立德嘅太太就話以前唔多飲酒，又憶述早年北上做生意時，少不免要應酬吓，但內地嘅敬酒文化好厲害，係要一圍枱逐個敬酒。咁一圍枱有幾多人？佢話十六個。即係飲足十五杯酒呀！都咪話唔嘢小，但佢話冇飲醉過，事關女性要講儀態o架嘛，會收斂啲。
王詩雅認為酒量冇分男女
席間亦見到廠商會常董陳家偉、會董梁承傑、常董李世傑同青委會副主席史昊洺。陳家偉就話以前爸爸畀佢試飲拔蘭地，當時佢已經覺得好難飲，所以依家都係間中飲吓酒。而另一名青委會副主席王詩雅就話酒量每個人都唔同，冇分男女嘅，佢就覺得女士飲得冇咁猖狂，而男士就飲得比較豪邁啲。
卓妮