政情：孫明揚夫婦揀玉器「最緊要合眼緣」

教育局前局長孫明揚（孫公）退休多年，日前佢同太太鍾小芬兩公婆拍住拖去睇首飾，孫太睇首飾時，孫公就乖乖地坐喺隔籬等候，認真有耐心。兩人逗留咗至少半小時先至離開首飾店，孫太仲有收穫添！問到係唔係孫公埋單找數，孫太就笑住話︰「梗係佢送啦！」

當日孫太睇中一條玉頸鏈，見佢睇得好仔細，不過因為要改長度，所以佢同孫公就坐咗成半個鐘。講起戴首飾，孫太特別鍾情玉石、翡翠等。咁咪好貴？佢話自己嗰啲都係朱義盛喎，真係信不信由你喇！

孫太又話，揀玉器最緊要係合眼緣，鍾意就得，又話鑽石可以雕琢，但玉石就獨一無二，唔會有第二粒一樣，所以如果睇啱就要買喇喎！