政情：甘藍莖攪汁撈餸 洪光汜自創一菜兩食
好多喺內地設廠嘅港商都有自家農園，養吓雞、種吓菜，工人伙食唔使憂之餘，自己亦食得安心。人稱「大熊」嘅仁愛堂總理洪光汜喺內地都有個六十幾畝嘅菜園，乜嘢菜都有，最近有朋友送咗加拿大甘藍嘅種子畀佢，所以連呢啲貴價入口菜都有得食。佢同廚師仲發明一菜兩食嘅獨家菜式，認真食得招積。
60畝菜園畀朋友摘
大熊讚佢嘅廚師好有創意，由於菜嘅莖通常比較硬，所以廚師經常將莖部另用鐵板咁上枱。佢都發明咗甘藍二食，即係將莖攪汁撈埋喺其他餸菜裏面，食落酸酸哋，非常過癮。
咁大嘅菜園，自己食梗係食唔晒，但大熊笑言唔會送人喎，點解？原來佢係話，如果朋友鍾意食就自己去摘，佢唔幫手摘，如果要佢摘嚟送畀人，咪忙過返工？