政情：車牌用女仔名 張俊勇唔驚老婆鬧
自訂車牌計劃實行多年，唔少人會借機展示訊息，甚至以愛侶名做車牌示愛。早排見到香港中華總商會常務會董張俊勇（Thomas），喺一架車牌為V字頭嘅七人車落車，而呢個車牌係一個女仔名，但細問下竟然唔係佢太太個英文名，咁大膽用第二個女性名做車牌？
Thomas就話太太英文名都係以V字開首，不過就無用嚟做車牌，因為無理由揸住太太周圍去，又要成日坐住佢，仲要有機會撞花喎。
三母女有份 夠晒溫馨
咁到底車牌個女仔名係邊個呢？佢就笑笑口話係大女個名，難怪明目張膽用第二個女仔名做車牌都唔怕太太話喇！至於二女個名嘅車牌佢就仲搵緊，但佢仲有另一個車牌係由三母女嘅英文名開首字母組成，所以唔怕佢哋呷醋，聽落好溫馨喎。