政情：胡炎松百無禁忌「有咩留番拜山先講」
早前喺一個活動上遇到香港潮州商會常務會董胡炎松，原來佢早前去咗美國紐約過年，因為佢囝囝喺當地有公司開張，去到發現原來美國都好有農曆新年氣氛，周圍都貼咗揮春，而囝囝公司開張都有舞獅睇，仲要由外國人舞，都舞得唔錯o架！
喺美國過年一樣熱鬧
胡炎松仲話囝囝雖然多數喺美國，但都好重視傳統，每年年底回鄉祭祖都一定會返嚟出席，事關呢件係全家族嘅事，所以佢哋成日講笑話：「有咩留番拜山先講」，因為一定最齊人嘛！真係百無禁忌喎。
講開傳統，農曆新年喺年十五元宵節完結，過咗十五就可以拆利是。隨住時代變遷，唔知仲有幾多人依然緊守呢啲傳統呢？同場嘅中西區民政事務專員黃何詠詩就係其中一個，佢話派利是唔止派到十五，會派晒成個正月，只要見到都會派咁話。