政情：今日你上鏡：睡魔急Call 張宇人迷濛眼影大合照
都市人生活忙碌，成日都唔夠瞓，返工間中「釣下魚」都好正常。身兼行政會議成員嘅立法會飲食界議員張宇人（Tommy）尋日出席一個頒獎禮活動時，突然被「睡魔」急Call，喺台上影大合照時睜唔開眼，只好向鏡頭報以一個微笑，似乎用一雙迷濛嘅眼睛迷倒大家！
頒獎禮大約喺下午三時左右開始，Tommy作為主禮嘉賓就率先上台就坐，喺等緊其餘近廿位嘉賓上台時，佢就開始合埋眼拍手，慢慢身體輕微搖晃，期間佢一度除下眼鏡拍面。
睜開眼撐唔夠三秒
之後等齊人影相時，Tommy好努力咁想張開對眼，但力不從心，半開眼兼擠出少少笑容，撐咗唔夠三秒，佢就放棄了。唔知大會攝影師有冇影低佢「最迷人嘅一刻」呢？