政情：桌遊諷刺 民主黨擺口吃鄭若驊上枱
「放生黎智英、唔告梁振英」而不斷捱轟嘅律政司司長鄭若驊，上任一年以來爭議聲此起彼落，嚟緊嘅農曆新年有政黨推出政治桌遊，將鄭若驊設計為其中一角，名為「口吃的律政司」，諷刺鄭喺任何時候只識答「我無補充」，面對傳媒同公眾時進退失據。
答問題淨係識講「我無補充」
維園年宵市場今日正式開鑼，民主黨（白鴿黨）創意媒體部尋日向傳媒介紹年宵檔主打產品：「議事廳狼人」，玩法同普通桌遊「狼人」差唔多，但以多個政治人物作為角色，地點就係立法會議事廳。
創意媒體部部長黎敬瑋話桌遊舊年已經完成設計，估唔到到今年仲啱用，當中鄭若驊角色以佢舊年上任初期嘅形象繪製，記得當時鄭若驊因僭建問題左閃右避，答問題咦咦哦哦，成日淨係講「我無補充」，無諗過佢識指指點點喎。