中環出更：三隧分流爭議大 袁莎妮表態支持
政府早前提出「三隧分流」方案，希望透過下調車流較少嘅西隧收費，同時上調紅隧同東隧嘅收費，吸引多啲駕駛者選擇行西隧，改善塞車情況，不過方案一出就備受爭議，反對聲音絕對唔細。有代表商界嘅自由黨議員講過支持，但隨後就畀人投訴。不過香港總商會總裁袁莎妮(Shirley)尋日都唔怕被攻擊，公開撰文表示支持。
指可紓緩道路瓶頸問題
Shirley喺香港總商會網站話，香港有令人羨慕嘅交通系統，塞車會削弱香港嘅高效率優勢，所以必須要改善核心商業區嘅車流問題，確保香港維持全球其中一個最佳營商城市嘅地位。三隧分流方案可以令三條隧道嘅車流更平均，有效紓緩繁忙時段嘅道路瓶頸問題。
講到實際影響，Shirley認為收費調整會喺中環灣仔繞道通車後先實施，所以唔擔心會搞到上環同中環更加擠塞。但對於反對聲音中其中一個主要觀點，即駕駛者行邊條隧道係會考慮目的地同方便程度為先，而唔係收費，Shirley就冇提及同回應喇。
卓妮