中環出更：謝偉銓裝cam偷拍同事驚喜到嘩嘩聲
今日係聖誕節，唔少立法會議員早前都拍短片放上Facebook，同市民一齊賀聖誕。當中謝偉銓（Tony）最有心思，佢化身「神秘聖誕老人」，等啲同事放工走晒之後，偷偷哋布置辦公室，又有聖誕樹，又有雪人，最重要當然係「Merry Christmas」，實行畀啲驚喜同新鮮感佢班同事。短片中見Tony一邊自拍一邊布置，足足搞到夜晚九點幾先完成。
整得咁辛苦，都想睇吓啲同事嘅反應。所以Tony第二朝一早就返到辦公室，仲安裝咗隱藏攝影機玩偷拍，結果個個同事返到嚟都嘩嘩聲，一睇就知Tony嘅計劃好成功，不過佢都反嘲自己：「老細整咗成晚，佢哋點可以答唔驚喜」。至於佢班同事係真心覺得驚喜，定係為咗氹Tony先咁講，就冇人知喇！
梁志祥試玩抖音
另一名議員梁志祥（祥哥）就試玩內地好流行嘅社交平台抖音，短片中佢由立法會入面突然跳咗去外面嘅添馬公園，再變裝成聖誕老人，同市民講聖誕快樂。祥哥話自己鍾意試新嘢，趁住聖誕就試吓抖音，不過佢話到依家都唔係好明點解吸引到咁多年輕人玩。祥哥敢玩敢試已經贏到網民嘅掌聲，有人大讚佢年輕喎。
陳凱欣換裝拍片
新丁議員陳凱欣都有拍片，佢換咗聖誕裝、戴埋麋鹿耳飾，喺十五秒嘅短片入面將同一個動作重複咗四次，查實係好普通嘅Gif圖，相比之下，祥哥條片都係得十秒，但睇落就有誠意、有心機得多，睇嚟佢要多啲同前輩請教先得喇！
卓妮