中環出更:李樹榮做領袖生長 霍泰輝妒忌足幾十年

皇仁書院創校百年,孕育出唔少社會知名人士,好似香港中文大學校長段崇智,以及兩位中大副校長霍泰輝同陳偉儀都係同屆畢業生,早前三人一齊返去皇仁參加皇仁舊生會晚宴,霍泰輝就被爆當年爭做領袖生長不遂。

早前皇仁舊生會喺母校禮堂大搞周年晚宴,吸引唔少校友返到母校話當年,好似立法會前秘書長馮載祥、香港民眾安全服務隊處長李樹榮同皇仁舊生會會長易永源等。

李樹榮同霍泰輝中一已經同班,佢到高年級後更獲任命為領袖生長,有得指揮只係擔任領袖生嘅霍泰輝同陳偉儀,更大爆霍泰輝當年因為做唔到領袖生長而妒忌咗佢四十幾年添!霍泰輝聽到都笑晒口,似乎無呢位老友收,笑住話唔服氣想罰嘅學生畀李樹榮罰晒喎,而陳偉儀亦抽水話領袖生長一職由校長委任,所以李樹榮當年權力好大咁話。

另外,霍泰輝亦話當年學校好自由,但學生做事都有分寸而唔會表現得太過分,就算曳都會尊重老師同別人,講粗口都唔會喺公眾場合同埋女生面前講,直言同現時嘅社會風氣有明顯分別。

段崇智當年受披頭四影響留長髮

至於同屆畢業嘅段崇智喺皇仁嘅日子就比較短,因為預科先轉到皇仁讀書,仲話當年排隊曾經畀領袖生趕,唔知嗰位領袖生會唔會就係兩位中大副校長呢?

佢之後又自爆當年披頭四非常流行,去咗美國升學時都自然留長頭髮,仲形容當年個樣非常恐怖,頭髮比披肩更長,不過依家想再留長頭髮都長唔到囉!

卓妮

第一手消息請下載on.cc東網iPhone/iPad/Android/Windows Phone Apps